PSE-EE PSOE Socialistas Vascos

Udalerriko ikastetxeetako ikasleen zenbait ordezkarik ikasturte honetan Lasarte-Oriako larreei, zelaiei eta loreei buruz egindako lana eta jarduteko proposamenak aurkeztu dituzte udal ordezkarien aurrean.

Aurten ekitaldia Osoko Bilkuren Aretora itzuli da. Bertan, 30 haur eta hainbat irakasle izan dira. Agustin Valdivia alkateak eta David Mateos, Maite Iglesias eta Nagore Duran Zerbitzu Publikoak, Hezkuntza eta Herritarren Partaidetzako zinegotziek zuzendu zuten ekitaldia, eta egindako lana eta Udalari egindako proposamenak entzun dituzte.

Hainbat hitzaldiren bidez, ikasleen ordezkariek lan-prozesua eta egindako jarduerak kontatu dituzte.

Ikasleek, hartutako konpromisoak azaldu zituzten:

1. Gure ingurune hurbilean zein mendietako, zelaiak, berdeguneak, basoak, zuhaitzak, landareak eta bertako animaliak zaindu eta errespetatuko ditugu.
2. Biodibertsitatea hazten lagunduko dugu: belarra eta zuhaitz adarrak ez moztuz, landareak landatuz, animaliak akabatu gabe, janlekuak jarriz...
3. Belardietara goazenean hamaiketakoa tupperretan eramango dugu zaborrik ez sortu eta ez botatzeko.
4. Zelaiak garbi mantenduko ditugu, sortzen ditugun hondakinak dagozkien lekuan utziz edo etxera eramanez.
5. Basoa eta patioa ez zikintzen saiatu eta garbiketarekin jarraituko dugu. Horretarako, patruila berdea berriz martxan jarriko dugu. Kartelak egin ditzakegu eta txandak zehaztu.
6. Konprometitzen gara mural bat egiteko gelan landareen zainketaz ohartzeko.
7. Bizikleta gehiago erabiliko dugu, ingurumenaren alde. Ondoren, proposamen hauek egin zizkioten udalari eta herritarrei:

Ikastetxeek honako konpromiso hauek hartu zituzten:

1. Zaborrontzien erabilera egokia gogoratzeko kartelak jarriko ditugu gure eskoletan.
2. Bertako loreen eta belarren panela egingo dugu denok izenak ikasten joateko.
3. 10. Gurasoen inplikazioa eskatuko dugu, beraiek ere partaide sentitu daitezen.

Alkateak eskerrak eman dizkie ikasle lasarteoriatarrei egindako lanagatik, eta puntualki erantzun die planteatutako gai guztiei. Adibidez, zenbait zuhaitz gaixo moztera behartzen duten arrazoiak, lorezaintza-kontratua luzatzea gure parkeen kontserbazioa hobetzeko.

Udalarentzako proposamenak

Udalari egindako eskaerak ikasleen artean adostu ziren bozketa bidez. Honako hauek dira:

EKIMENAK

1. Bi ikastetxeetako jolastokietan iturriak jartzea nahi dugu eta herrian puskatuak daudenak konpontzea.
2. Egurrez egindako zuhaitz-etxea Sasoetan eta Landaberriko jolastokietan jartzea gustatuko litzaiguke.
3. Belardi egokiak nahi ditugu, adibidez:
   1. Aisialdirako belardiak Atsobakarren (Golf plaza, Caddie plaza,…) eta Jaizkibel plazan adibidez.
   2. Eta bestalde, ikerketarako eta behaketarako belardiak. Hauek ez lirateke moztuko eta kartelak jarri beharko lirateke bere funtzioa zein den adierazteko.
4. Belardietan egurrezko eserleku eta mahai gehiago egotea proposatzen dugu.
5. Herrian, herritarrek erabili ahal izateko herri-baratzak egitea.
6. Ingurumen-hezkuntzako jarduerak diseinatzea, programatzea eta egitea.
7. Belazearen eguna izendatu eta antolatu, herritarren artean kanpaina bat abian jarriz.
8. Txorientzako habiak jartzea eta mantentzea.
9. Baserrien ibilbide naturalistikoa: herriko nahiz kanpoko jendeak Lasarte-Oriako baserriak ezagutzeko ibilbide turistikoa kartelekin markatzea, bai eta baserri bakoitzaren izena ere.

Alkateak gai horiek guztiak aztertzeko konpromisoa hartu zuen, eta eskerrak eman zizkien galderak ondo planteatuta egoteagatik. Jakinarazi zienez, ikastetxeetako iturriak erretiratu egin ziren, aurretik gaizki erabiltzen zirelako. Zuhaitz-etxeari dagokionez, arriskutsua zela adierazi zuen. Halaber, aipatu zuen hiriko belardiak maiz moztu behar direla, beren funtzioa bete dezaten, eta herritarrek etengabe eskatzen dutela. Gogorarazi zien HAPOk landa-parke handi bat aurreikusi duela Plazaolan, eta bertan egin ahal izango dela planteatzen dutena. Halaber, jakinarazi zien apurka-apurka jarlekuak eta mahaia jarri dituztela parkeetan, eta horrek aurrera jarraituko duela. Eta jarduerei dagokienez, Aste Berdeari buruz aritu zen, bisita gidatuak, ibai-garbiketak... egiten dira. Azkenik, alkateak planteatu zuen ikasturtearen hasieran ikastetxeekin batera etxeak eta habiak jar zitezkeela udalerrira hegaztiak erakartzeko.

ZAINDU

1. Belardiak txukun mantentzea, baina belarra maizegi moztu gabe.
2. Sasoetako eskolan dagoen “tunela” konpondu edo kentzea nahi dugu belardia erabili ahal izateko.
3. Landaberrik atzeko belazearekin muga egiten du eta hesia oso narrats dago (sasi ugari, plastikozko sare hautsia, txarrantxa zatiak,…). Hesi naturalak bizitza iturri direla ikasi dugunez, udalari eskatuko genioke hesi hori txukundu dezan. Bertan, lizarrak, astigarrak eta zuhaixkak daude. Horiek mantenduz hesia txukuntzea izango litzateke gure eskaera.

Belarra mozteari buruz alkateak esan zien gurasoek eskatzen dutenarekin kontraesanean dagoela eta hiriko lorategiak behar bezala mantendu behar direla. Plazaolako tunelaren hondarrei dagokienez, adierazi zuen hondar historiko hori mantendu egin behar dela, baina ingurua konpontzeko aukera aztertuko dutela, erabili ahal izateko.

BESTELAKOAK

1. Urteroko eskaera bada ere, Landaberrira joateko bideak oso gaizki jarraitzen du. Badakigu lurra Donostiari dagokiola, Donostiako udalarekin hitz egin da? Konpontzea aurreikusten da?
2. Ikastetxeetako patioen egoera ez da oso ona izaten asteburu ondoren, lehenago garbitzea eskertuko genuke.
3. Hainbat berdeguneren ondoan birziklatzeko zaborrontzi gehiago jartzea.