partekatu
• LASARTE-ORIA SARIA
Lasarte-Oria Sariak ehunka igerilari gazte bilduko ditu berriro maiatzaren 30ean Maialen Chourrauten
Buruntzaldea IKTk antolatzen du proba, eta Lasarte-Oriako Udalaren laguntza du. Horrez gain, Tratu On Bat markaren babesa ere badu.
Goizalde Pildain Narvarte Kiroletako zinegotziak eta Nuria Fernández Castrillo Sozio-ekonomiako zinegotziak Lasarte-Oria Sariaren edizio berri bat aurkeztu dute gaur goizean, Buruntzaldea IKT-k antolatuta, Gipuzkoako igeriketa egutegiaren barruan dagoeneko finkatuta dagoen hitzordua.
Lehiaketak Maialen Chourraut kiroldegian bilduko ditu kategoria ezberdinetako klub eta kirolari gazte ugari, Lasarte-Oria berriz ere oinarrizko kirolaren eta lehiaketako igeriketaren topagune bilakatuz. Egun osoan zehar hainbat proba eta kategoria izango dira.
Aurkezpenean, udal arduradunek Buruntzaldea IKTk urte osoan zehar igeriketa eta kirola sustatzen egiten duen lana nabarmendu nahi izan dute, baita horrelako lehiaketa batek suposatzen duen antolakuntza esfortzua ere.
Lasarte-Oriako Udalak aktiboki parte hartzen du ekitaldian, kirol-instalazioak eta proba egiteko behar den material logistikoa lagata. Gainera, sariak “Tratu On Bat” udal markaren babesa du. Sozioekonomia arloak bultzatzen du marka hori, udalerriko gizarte, kirol eta ekonomia bizitza dinamizatzen duten ekimenei laguntzeko.
Udalak herritarrak animatu ditu kiroldegira hurbiltzera eta kirol jardunaldi batez gozatzera. Egun horretan, udal instalazioak giroz beteko dira berriro, eta parte hartu duten igerilari gazteen lana eta dedikazioa eskertuko da.
