partekatu
• IKASTETXEAK
Lasarte-Oriak 1.212.350 euroko inbertsioa egingo du hiru urtean ikastetxeak hobetzeko
Hiru urteko inbertsio-planak 1.212.350 euro bideratuko ditu lehen hezkuntzako lau ikastetxeak hobetzeko obretarako. Proiektuak ikastetxeetako zuzendaritzekin eta guraso-elkarteekin adostu dira, eta Eusko Jaurlaritzaren 751.974 euroko finantzaketa aurreikusten dute.
Lasarte-Oriako alkate Agustín Valdiviak lehen hezkuntzako ikastetxeetarako hiru urteko inbertsio-plana aurkeztu du. Planaren helburua da lau ikastetxeak kalitate-estandarretara egokitzeko beharrezkoak diren obrak egitea.
Aurreikusitako inbertsioek 1.212.350 euroko aurrekontua dute, eta urtero aurkeztuko dira Eusko Jaurlaritzako Hezkuntza Sailaren Udal-laguntzak programan, % 60ko finantzaketa lortzeko, hau da, 751.974 euro.
Hauek dira proiektatutako obrak:
Sasoeta IP
Aurten, Loidi-Barren frontoiaren atzeko aldetik, beste oholtza bat egitea aurreikusi da, eta 2021eko aurrekontu parte-hartzaileetan aurkeztu eta onartu zen. Aurreikusitako kostua 232.150 euro da. Gainera, ikastetxearen barruko gune bat berrurbanizatzea (35.794 euro) eta alarma instalatzea (5.000 euro) aurreikusi da.
Datorren urtean, administrazio-eraikinaren eta gimnasioaren estalkiak eta fatxadak eraberritzeari ekingo zaio. Aurrekontua 232.151 eurokoa da.
Zumaburu IP
Aurreko agintaldian nabarmen birmoldatu zen ikastetxe horretarako aurreikuspena hauxe da: 2021ean alarma instalatzea (5.000 euro), eta 2022an, hesiaren zati bat eta salto-gela konpontzea 22.379 euroan.
Garaikoetxea I.P.
Aurten ikastetxearen alarma instalatuko da, 5.000 eurokoa. 2022an hesiaren zati bat konponduko da (68.063 euro) eta HH2 mailako joko-gune bat estaliko da, oraindik baloratu gabe dagoena.
Landaberri I.P.
Ikastetxe horrek 2021 eta 2023 bitartean aurreikusitako inbertsioen % 50 jasoko du. Aurten, aurreikusita dago patioak 136.848 euroan asfaltatzea, hainbat erabileratarako karpa bat instalatzea 43.202 euroan, hainbat konponketa futbol-zelaian 18.091 euroan eta alarma instalatzea 5.000 euroan. 2022an hainbat konponketa egingo dira ateetan eta zokaloetan, eta 45.378 euro bideratuko direla aurreikusi da. Azkenik, 2023an fatxada berria egitea aurreikusi da, eraikinaren kalitatea eta isolamendu termikoa hobetzeko, 358.294 euroko aurrekontuarekin.
Udalak hainbat bilera egin ditu ikastetxeetako zuzendaritzekin eta Gurasoen Elkarteekin, egin beharreko obren beharrak zehazteko, Udalaren ekonomia- eta kudeaketa-ahalmenen barruan, eta Eusko Jaurlaritzako Hezkuntza Sailak baliabideak lortzea bere gain hartu du uneoro. Horregatik, obra guztiek jaso beharko dute Udal-laguntza programaren finantzaketa, ikastetxeetan inbertsioak batera finantzatzeko.
