PSE-EE PSOE Socialistas Vascos

Joan den irailaren 12ko ostegunean, Udalbatzarrak Manttangorri hiribusaren zerbitzu berria onetsi zuen. Agustin Valdivia alkateak eta David Mateos Zerbitzu Publikoetako zinegotziak kontratu berri hau zertan datzan azaldu dute.

Alkateak adierazi zuen denbora luzez aritu direla kontratu horretan lanean, Lasarte-Oriako herritarren hiri-garraioa hobetzeko eta, batez ere, Zabaleta eta Zatarain bezalako auzo garaiak eta udalerriko beheko aldea lotuko dituen zerbitzu batean pentsatzen.

Aurreko kontratuak ez zuen gehiago luzatzeko aukerarik ematen, eta, beraz, amaitutakoan landu ahal izan da zerbitzu berria.

Aldaketa horrek, ibilbidean eta ordutegietan hobekuntzak ekartzeaz gain, errekuntzako autobus batetik autobus elektriko batera igarotzea ere ekarriko du. Hala ere, enpresak urtebeteko epea du autobusa ekartzeko, adjudikazioa onetsi ondoren egiten baitute eskaera.

Aurreko zerbitzuaren aldean, honako hobekuntza hauek izango ditu:

- Maiztasunak handitzea, ibilbideen arabera 7: 40an hasiz eta 21:00ak inguruan amaituz.

- Ibilbide berriak, Zatarainekin eta San Frantziskorekin komunikatzeko.

- Geraleku berriak ohiko ibilbideetan, eta kasu batzuetan "eskariaren araberako geldialdia" egiteko aukera.

- Zerbitzua larunbatean ere emango da

- "Gautxori" gauezko zerbitzua egun berezietarako (San Pedro jaiak, Gabon gaua, Urtezahar gaua, Inauteriak, Erregeen bezpera...)

- Pertsonala bikoiztu egingo da, txofer bat izatetik bi izatera pasatuz, eta lehendik zegoena mantendu egingo da.

David Mateosek nabarmendu zuen asmo handiko proiektua dela, eta hiri-garraioa zerbitzu erregularra izan dadin eta MUGI tarifa-sisteman sartuta egoten jarrai dezan behar den guztiaz hornitu nahi izan dutela. "Ibilgailua etxean uztea eta autobusa erabiltzea bultzatu nahi dugu"

Autobus berriak egungoak baino edukiera handiagoa izango du, 40 plazatik gorakoa. Beraz, handiagoa denez gero, ibilbidearen tarte batzuk aldatu egin behar izan dituzte, biraketekin zailtasunik izan ez dadin. Gainera, ibilgailu modernoagoa izango da, gaur egungoa 2.000ko hamarkadakoa baita.

Laster emango dituzte ezagutzera ordutegi eta geraleku berriak.

Kontratua 7 urterako da, eta 1.835.665,35 euroko kostua du, BEZa barne.